Virus letale [di Wolfgang Petersen, 1995]

La vita ai Tempi del Corona

Sentiti, sentiti, sentiti cristiani

Sentiti genti vicini e luntani

U coronavirus da Cina rrivau

E chianu chianu a tanti nfettau.

Rivvau pe’ prima nta Lumbardia

E nta nnenti ci fu l’epidemia

Si parinchiru tutti i spitali.

Non ndavi medicini pe’ stu mali.

Prestu di tutt’Italia si mpatruniu

Non cercau permessu e nta tutti i reggioni trasiu

Nta tuttu u mundu stu virus viaggiau

E comu na macchia d’ojiu si allargau.

Guvernu e medici ndi misuru ‘n quarantena

Ogni jornu nta televisione a stessa cantilena

Rrestati a casa e non nesciti fora

Ca ndavi lu virus corona.

E se nesciti pe’ bbisognu di necessità

Mascherini, guanti e disinfettanti ‘n quantità

I parenti non si ponnu bbracciari

Nenti stretta di manu e mancu baciari

A distanza di du’ metri ndaviti a stari

Se no lu coronavirus potiti pijiari

Puru a cresia rrestau ssulicata

A ggenti numma veni cuntaggiata

Nenti missi, matrimoniji, funerali

A causa di chiustu grandi mali

Non sapimu cchiù a quali santu ndi votamu

E ognu jiornu lu Patreternu nui pregamu

Nginocchiati ti facimu st’accoratu appellu:

Cunta i nostri meriti, ferma stu flagellu

Manda lu Spiritu Santu supra a Terra

I mmazza stu virus e mu sotterra.

Staci portandu morti pe’ tuttu lu Mundu

Non permettiri Patreternu u veni u finimundu

Tu criasti lu cielu, terra e mari

E non criju ca ora ndi voi abbandunari.

Ndi rivolgimu puru a ttia Matri Maria

Mun ndi ccumpagni sempre pe’ la via

E cu to’ fijiu nostru caru Signuri

intercedi pe’ nui poveri peccaturi,

E vui giuvanotti che vi ffacciastuvi a li barcuni

Mu sonati e mu cantati li canzuni

Ffacciativi e recitati ‘na Salve Regina

Arzati l’occhi ‘o cielu ca c’è na grandi Reggina

Di tanti grazie ija sula esti china.

E si usamu tutti a mascherina

Stu virus scompari nta na quindicina.

Testo e voce: Silvana "parlina" Trimboli, platiese residente in Caraffa del Bianco.
Edward Hopper's paintings from Shirley: Visions of Reality (2013) by Gustav Deutsch
Songs: El Zocalo - La Llorona by Beirut

Trascrizione: Rosalba Perri

Nota di Rosalba Perri:

Ho ricevuto questa poesia in forma audio da mia zia Suor Carmen che l'aveva a sua volta ricevuta con la dicitura "una mamma di Platì".

Una dizione perfetta, una intonazione accorata che diventa quasi una giaculatoria specialmente alla fine quando si invoca l'intervento divino.

Una voce calda e materna che mi ha ricordato mia nonna Rosina.

Ho girato l'audio per scoprire di chi fosse quella voce e l'informazione mi è arrivata da mia cugina Pina Miceli di Bovalino. Si tratta di Silvana Trimboli che, sebbene risieda a Caraffa, è la figlia di Antonio Trimboli di Platì tragicamente scomparso nel 1959, già ricordato un alcune pagine del blog:

https://iloveplati.blogspot.com/2019/09/una-vita-spezzata-neil-coombs-2008.html

Voglio ricordare che il soprannome di questa famiglia Trimboli, che nelle varie prionunce è stato storpiato in "parlinu" e addirittura "pallinu" (compatibili con le pronunce piuttosto aperte della a e la trasformazione della r in l) è in effetti "perlinu" come l’ho sempre sentito pronunciare nella mia famiglia e come è confermato da documenti dell'800.